Krushi Salla | हवामानावर आधारित कापूस, तूर, रब्बी भुईमूग, मका, ज्वारी, सूर्यफूल पिकांसाठी कृषी सल्ला व पीक व्यवस्थापन

वसंतराव नाईक मराठवाडा कृषी विद्यापीठ, परभणी येथील ग्रामीण कृषी मौसम सेवा योजनेतील तज्ञ समितीने कापूस, तूर, रब्बी भुईमूग, मका, ज्वारी, सूर्यफूल पिकात पुढील प्रमाणे कृषी हवामान आधारीत कृषी सल्ल्याची शिफारस केली आहे.

वेचणीस तयार असलेल्या कापूस पिकात (Cotton Crop) वेचणी करून घ्यावी. कापसाच्या झाडावर 40 ते 50 टक्के बोंडे फुटल्यास वेचणी करावी. वेचण्या पंधरा दिवसाच्या अंतराने कराव्यात. पूर्ण फुटलेल्या बोंडातीलच कापूस वेचावा. पहिल्या आणि दूसऱ्या वेचणीचा चांगला आणि कवडी कापूस वेगळा साठवावा.  

तूरीवरील शेंगा पोखरणाऱ्या अळीच्या नियंत्रणासाठी ५ टक्के निंबोळी अर्क किंवा क्विनॉलफॉस (२५ %) २० मिली किंवा इमामेक्टीन बेन्झोएट (५ %) ४.५ ग्रॅम प्रति १० लिटर पाण्यात मिसळून फवारणी करावी. तूर पिकातील फुलगळ रोखण्यासाठी एनएए ३ मिली प्रति १० लिटर पाण्यात मिसळून फवारणी करावी. 

रब्बी भुईमूग पिकात पेरणी नंतर तिन ते सहा आठवडयांनी दोन कोळपण्या आणि एक खुरपणी करावी. 

रब्बी मका पिकाची पेरणी नोव्हेंबर पर्यंत करता येते. पेरणी ६० बाय ३० सेंमी अंतरावर करावी. पेरणीसाठी हेक्टरी १५ किलो बियाणे वापरावे. पेरणीपूर्वी बियाण्यास बिजप्रक्रिया करावी. पेरणी करतांना ७५ किलो नत्र, ७५ किलो स्फुरद व ७५ किलो पालाश प्रति हेक्टरी द्यावे आणि ७५ किलो नत्र पेरणीनंतर एक महिण्यांनी द्यावे.  

मका पिकावर लष्करी अळीचा प्रादुर्भाव दिसून येत असल्यास व्यवस्थापनासाठी इमामेक्टीन बेन्झोएट (५ टक्के) ४ ग्रॅम किंवा स्पिनेटोरम (११.७ एससी) ४ मिली प्रति १० लिटर पाण्यात मिसळून आलटून पालटून फवारणी करावी. फवारणी करत असताना किडनाशक पोंग्यात पडेल अशाप्रकारे फवारणी करावी. 

रब्बी ज्वारी पिकात पेरणी नंतर १५ ते २० दिवसांनी पहिली कोळपणी करावी. पेरणीनंतर २५ ते ३० दिवसांनी संरक्षित पाणी द्यावे. रब्बी ज्वारी पिकात लष्करी अळीचा प्रादुर्भाव दिसून येत असल्यास व्यवस्थापनासाठी इमामेक्टीन बेन्झोएट (५ टक्के) ४ ग्रॅम किंवा स्पिनेटोरम (११.७ एससी) ४ मिली प्रति १० लिटर पाण्यात मिसळून आलटून पालटून फवारणी करावी. फवारणी करत असतांना किडनाशक पोंग्यात पडेल अशाप्रकारे फवारणी करावी. रब्बी ज्वारी पिकाची पेरणी करून ३० दिवस झाले असल्यास नत्राची अर्धी मात्रा ८७ किलो यूरिया प्रति हेक्टरी द्यावा. 

रब्बी सूर्यफूल पिकाची पेरणी करून २० दिवस झाले असल्यास पहिली कोळपणी करावी. बागायती गहू उशीरा पेरणी १५ डिसेंबर पर्यंत करता येते. गव्हाची पेरणी करतांना १५४ किलो १०:२६:२६ + युरिया ५४ किलो किंवा ८७ किलो डायअमोनियम फॉस्फेट + युरिया ५३ किलो + ६७ किलो म्युरेट ऑफ पोटॅश ‍किंवा ८७ किलो युरिया + सिंगल सुपर फॉस्फेट २५० किलो + ६७ किलो म्युरेट ऑफ पोटॅश प्रति हेक्टरी खतमात्रा द्यावी. राहिलेले अर्धे नत्र ८७ किलो यूरिया प्रति हेक्टरी पेरणीनंतर २५ ते ३० दिवसांनी द्यावे.

सध्या किमान तापमानात घट झाल्यामुळे केळी पिकावर याचा परिणाम होऊ नये म्हणून बागेस सकाळी मोकाट पध्दतीने पाणी द्यावे. 

आंब्याच्या मोहोरावरील तूडतूड्यांच्या व्यवस्थापनासाठी डायमिथोएट (३० %) १३ मिली किंवा थायामिथोक्झाम (२५ %) २ ग्रॅम प्रति 10 लिटर पाण्यात मिसळून फवारणी करावी.    

हे पण वाचा –

• या तारखेला होणार मान्सून केरळात दाखल तर महाराष्ट्रात या दिवशी आगमन पहा संपूर्ण माहिती..! Monsoon 2024
• Manikrao Khule Havaman Andaj : शेतकऱ्यांसाठी दिलासादायक! अवकाळी वातावरणापासून मिळणार सुटका, वाचा आजचे व उद्याचा हवामान अंदाज 
• Maharashtra Weather Update : “इथे” उष्णतेची लाट तर विदर्भ मराठवाड्यावर अवकाळी पावसाचे संकट कायम! असे असेल आजचे हवामान
• Monsoon 2024 पुढील 4 दिवस महाराष्ट्रातील या जिल्ह्यांना मुसळधारेचा इशारा 20 ते 24 एप्रिल 2024
• Punjab Dakh पंजाबरावांचा नवीन हवामान अंदाज, ‘या’ तारखेपर्यंत महाराष्ट्रात सुरु राहणार वादळी पाऊस । उद्याचे हवामान